प्रभाकर नेवगी केवळ पत्रकार नव्हते, तर ते चांगले नाट्यलेखक, स्फुटलेखक होते. त्यांनी आपली पत्रकारिता नवाकाळमधून सुरू केली होती. त्यानंतर मराठा व सकाळमध्ये काम केले होते. सकाळ वर्तमानपत्रातून त्यांनी नवृत्ती घेतल्यानंतरही ते गप्प बसले नाहीत. आपल्या नवृत्तीच्या काळातही त्यांनी विविध वर्तमानपत्रांतून विपूल लेखन केले. दै. 'पुण्य नगरी'मध्ये त्यांनी 'मिश्किली', 'खमंग' अशी चटपटीत सदरे चालवली. त्यांनी दै. 'प्रहार'मध्येही लेखन केले होते. त्यांचे शिक्षण शिरोडकर हायस्कूल, परळ येथे झाले होते. कोणत्याही प्रसंगावर कोटी करणे त्यांना सहज जमायचे. त्यासाठीच त्यांना 'कोटीश्‍वर' असे टोपणनाव पडले होते. कोणत्याही प्रसंगावर तत्काळ भाष्य करणे, कोटी करणे त्यांच्या हातचा मळच होता. त्यांना नाटकांचीही आवड होती. ते कामगारांमध्ये खूपच प्रसिद्ध होते. त्यांनी कामगार विश्‍वाला प्रकाशझोतात आणण्यासाठी विपुल लेखन केले. त्यांनी 'साहेब' नावाचे एक सुंदर नाटकही लिहिले होते. अतिशय शांत स्वभावाचे तरीही मिश्कील असलेले नेवगी गेल्याने अनेकांनी हळहळ व्यक्त केली आहे. दै. 'पुण्य नगरी'चे सल्लागार संपादक राधाकृष्ण नार्वेकर, काशिनाथ माटल, दीपक म्हात्रे, शिवाजी धुरी आदींनी त्यांच्या कुटुंबीयांचे सांत्वन केले.